ដោយ: គង់ លាងហួរ
អន្តរជាតិ: យោងតាមកាសែត The Business Times បានរាយការណ៍ថា គិតត្រឹមខែកក្កដា ឆ្នាំ២០២៥នេះ ការលក់ផ្ទះនៅក្នុងប្រទេសកាណាដាបានកើនឡើងក្នុងរយៈពេល៤ខែជាប់ៗគ្នា ខណៈទស្សនវិស័យសេដ្ឋកិច្ចបានបង្ហាញសញ្ញាប្រសើរឡើង។
នៅខែកក្កដា ការលក់ផ្ទះទូទាំងប្រទេសកាណាដាបានកើនឡើងក្នុងរង្វង់៣,៨ភាគរយបើធៀបនឹងខែមិថុនា។ នេះបើយោងតាមទិន្នន័យ ដែលបានចេញផ្សាយដោយសមាគមអចលនទ្រព្យកាណាដា (Canadian Real Estate Association)។
អត្រាកំណើនខាងលើនេះត្រូវបានជំរុញដោយការលក់ផ្ទះនៅទីក្រុង Toronto ដែលសម្រេចបានកំណើននៃការលក់ផ្ទះក្នុងរង្វង់៣៥,៥ភាគរយចាប់តាំងពីខែមីនា ឆ្នាំ២០២៥។ទីក្រុងតូរ៉ុនតូ (Toronto) ជាទីក្រុងធំជាងគេបំផុតក្នុងប្រទេសកាណាដា។
ចំនួនលំនៅដ្ឋានសរុប ដែលដាក់លក់នៅទូទាំងប្រទេសកាណាដាកាលពីខែកក្កដា បានហក់ឡើង១០,១ភាគរយបើធៀបនឹងឆ្នាំមុន។ ចំណែក តម្លៃលំនៅដ្ឋានជាមធ្យមបានស្ថិតនៅទ្រឹងត្រឹមទំហំទឹកប្រាក់ប្រមាណ៤៩៨.៩០១ដុល្លារអាមេរិក ក្នុងខែកក្កដា បើធៀបនឹងខែមិថុនា។
ការព្រួយបារម្ភចំពោះវិបត្តិសេដ្ឋកិច្ច ដោយសារសង្គ្រាមពាណិជ្ជកម្មរបស់សហរដ្ឋអាមេរិក បានធ្វើឱ្យសេដ្ឋកិច្ច និងទីផ្សារលំនៅដ្ឋានរបស់ប្រទេសកាណាដាធ្លាក់ចុះកាលពីដើមឆ្នាំ២០២៥។
ប៉ុន្តែ ទោះជាយ៉ាងណាក្តី កំណើនសេដ្ឋកិច្ចក្នុងប្រទេសកាណាដានៅតែរក្សាបានស្ថិរភាព ដោយសាររបាំងពន្ធគយភាគច្រើនជះផលប៉ះពាល់ដល់ឧស្សាហកម្មជាក់លាក់មួយចំនួនប៉ុណ្ណោះ ដូចជារថយន្ត ដែកថែប និងអាលុយមីញ៉ូម៕ប្រភព: The Business Times៕
