ដោយ: គង់ លាងហួរ
អន្តរជាតិ: ការសិក្សាលទ្ធភាពសាងសង់បណ្តាញផ្លូវដែកល្បឿនលឿនតភ្ជាប់រវាងរដ្ឋ Sabah និងរដ្ឋ Sarawak របស់ម៉ាឡេសុីទៅកាន់ប្រទេសប្រ៊ុយណេ និងកោះ Kalimantan របស់ប្រទេសឥណ្ឌូនេស៊ី គ្រោងនឹងបញ្ចប់រួចរាល់នៅត្រីមាសទី៣ ឆ្នាំ២០២៦។
លោក Anthony Loke រដ្ឋមន្ត្រីក្រសួងដឹកជញ្ជូនម៉ាឡេសុីបច្ចុប្បន្នបានអះអាងថា រដ្ឋាភិបាលបានប្រគល់ភារកិច្ចទៅកាន់ក្រុមហ៊ុនប្រឹក្សាយោបល់ក្នុងស្រុកមួយដើម្បីធ្វើការសិក្សាអំពីលទ្ធភាពរយៈពេល១២ខែសម្រាប់កំណាត់ផ្លូវដែកនៅរដ្ឋ Sabah និងរដ្ឋ Sarawak ខណៈការសិក្សាបានចាប់ផ្តើមនៅក្នុងខែមិថុនា ឆ្នាំនេះ។
លោក Anthony Loke បានគូសបញ្ជាក់ថា ការសិក្សានេះនឹងបង្ហាញអំពីការវិភាគប្រៀបធៀបលម្អិត ដែលគ្របដណ្តប់លើផ្នែកបច្ចេកទេស ពាណិជ្ជកម្ម សេដ្ឋកិច្ច ប្រតិបត្តិការ អភិបាលកិច្ច និងការពិចារណាលើផលប៉ះពាល់ចំពោះសង្គម។
ប្រព័ន្ធផ្សព្វផ្សាយក្នុងស្រុករបស់ម៉ាឡេសុីធ្លាប់បានរាយការណ៍ថា រដ្ឋាភិបាលម៉ាឡេសុីបានវិភាជន៍ទំហំទឹកប្រាក់ចំនួន៧លានរីងហ្គីតសម្រាប់ផ្តល់មូលនិធិដល់ការសិក្សាលទ្ធភាពសាងសង់គម្រោងផ្លូវដែកល្បឿនលឿនTrans-Borneo នេះ។
គម្រោងផ្លូវដែក Trans-Borneo តភ្ជាប់រវាងម៉ាឡេសុី ប្រ៊ុយណេ និងឥណ្ឌូនេសុី ត្រូវបានផ្តួចផ្តើមជាលើកដំបូងនៅក្នុងឆ្នាំ២០១៥ ដោយលោក Najib Razak អតីតនាយករដ្ឋមន្ត្រីម៉ាឡេសុី។
លោក Najib បានស្នើគំនិតនេះទៅកាន់អតីតប្រធានាធិបតីឥណ្ឌូនេស៊ីលោក Joko Widodo ដើម្បីបង្កើនការតភ្ជាប់ឆ្លងដែន ក្នុងគោលបំណងសម្រួលលំហូរប្រជាជន ទំនិញ និងសេវាកម្ម។
កាលពីខែមេសា ឆ្នាំមុន ក្រុមហ៊ុន Brunergy Utama ដែលមានមូលដ្ឋាននៅប្រទេសប្រ៊ុយណេបានអះអាងថា ខ្លួននឹងដឹកនាំការសាងសង់គម្រោងផ្លូវដែកតម្លៃ៧០ពាន់លានដុល្លារអាមេរិកនេះ ជា២ដំណាក់កាល ដែលលាតសន្ធឹងលើចម្ងាយជាង១.៦០០គីឡូម៉ែត្រ និងដាក់ឱ្យប្រើប្រាស់រថភ្លើងដែលអាចរត់ក្នុងល្បឿន៣៥០គីឡូម៉ែត្រក្នុងមួយម៉ោង។
ទោះជាយ៉ាងណា ក្រោយមកលោក Anthony Loke បានច្រានចោលការអះអាងរបស់ក្រុមហ៊ុន Brunergy ដោយលោកសង្កត់ធ្ងន់ថា គម្រោងនេះកំពុងស្ថិតក្នុងដំណាក់កាលសិក្សា និងមិនទាន់ត្រូវបានផ្តល់កិច្ចសន្យាសាងសង់ដល់ក្រុមហ៊ុនណាមួយនៅឡើយទេ៕ប្រភព: Dayak Daily ៕
